گەنج و سنێلە خەتیرێن گەشن دناڤا جڤاکێ دا

0
ئەحمەد بالایی
ئەحمەد بالایی
کوردپورتال/ ئەحمەد بالایی
بێگومان هەر تاکە کەسەکی ژیانا سنێلەیی و گەنجاتیێ د چاخ و دەمێن خوە دا دەربازکرنە، تۆشی هن ئارێشە وکریزێن سەخت ودژوار دبن، چ دوارێ ئابووری و جڤاکی دا، یان د وارێ سیاسی وفیزیکی دابە. لێ دەم بۆ دەمی جودایە، ژبەرکو پێش چەندین سالە ژ سەدەما هێرشێن رژێمێن سەردەست، دەربەدەرکرن، ئەشکەنجە، زیندانان و… هتد مە نەدزانی وەرزێن ژیانێ د چ قوناغدا دەربازدبن و بەرب کیژان چارەنڤێس دچە، کا جاوان خەتیرێن ئازادیێ ل پێشیا کاروانێ خەبات وتیکۆشینێ گەش دبن، کا چاوان دەستێن مرۆڤان ب خوینا هەڤدوو سۆر دبن، رەنگێ رۆناهیێ ل پێش چاڤێن هەریمەنان رەش دبن، ژبەرکو هەرتم ئەم د سەنگەرێ خوپاراستنێ دابووین دناڤ مژا مرنێ وەردبووین بەرێ رۆگەها مە وەرگێرابوو مە نەدزانی بەژنا خوە بۆ کیژان سەنەمێ بێدادیێ بتەوینین. دیسان ژیانا مە نە د دەمێن خوە یێن سرۆشتی دا دەرباز ب بوون، کو بزانین تاما ژیانا سنێلەیێ و گەنجاتیێ یا چاوانە، لەوما مە چ ژتام و بێهنا ژیانا ئازاد نەدزانی کا بوهارا ژیێ مە چ جۆرێن گولا همبێزدکرن، کا چاوان ئاشق وئەڤینداران بشکوژێن رەنگین ل ناڤ باخچێن ئەڤینێ پێوان دکرن، کا چاوان شەڤ و رۆژێن مە مینا سیبەرا کەڤران ل بەرمە دبوونە سەهم و رەشە بەختێ خوە لمە وەردگێران ب هەزاران هیڤی و ئومێد د کوراتیا سنگێ مەدا دمرن ل گەل داڤین رۆژێ ئاڤادبوون، کا چاوان مە بەژنێن نازک و گەردەنێن ب مووری د ناڤ پێلێن خوەنێن خۆدا کەهی دکرن، دەمارێن خوە یێن وەستیایی پێ تەنادکرن. لێ هەرتم هیڤیا مە ب ئەڤینا خاک و نیشتیمان خۆرت و ب هێز بوویە. مە چ جاران سەنگەرێن رۆمەتێ ژ دوژمناران ڤالا نەدکرن، وەلاتێ خوە ژبۆ هێزێن تاریێ چۆل نەدکرن، باوەریا مە ب کار و خەباتا شەرڤانێن ئازادیێ خۆرت وموکۆم بوویە کو رۆژەک دێ ل سەر چیا و زنارێن وارێ مە هەلێتن هێزێن تاریێ ژ وارێ مە بارکەن، دەنگێ ئازادیێ زنجیرێن زیندانان ب قەتینن گەنج و سنێلەیێن گەلێ مە دناڤا رەنگێن ژیانێ دا سەما ئازادیێ بکەن، هەر کەس ب گەهیتە ئارمانژ و مەرەمێن خوەیێن سرۆشتی، کو هەر سنێلەک دەستێ یارا خوە بگریت دناڤ پێلێن دەرییا ئەڤینێ دا مەست و سەرخۆش ب بن ژیانەک ب نرخ و ئازاد ب بەنە سەر، پاشی ئەڤینەک پاک و پیرۆز ل سەر تەختێ ئازادیێ ب رازینن، ژ بەرکو ئەڤینا بن دەست وکولەتی چ تام و زاخ ژێناهێتن. پێویستە پێش هەر تشتی مرۆڤ هەول بدەت کو دژیانێ دا یێ ئازاد دبیت، پاشی دەرگەهێ ئەڤینێ دسنگێ خوەدا ڤەکەت ژبۆ دلێ خوە گولەکێ ژباخجێ ئەڤینێ هەلبژێریت وخێزانەک سەرکەتی دناڤ جڤاکێ دا پێک بینیت.
دەما دەروێشێ عەبدی عەدولا کچا تەمەر پاشایی مللی ژ خۆرا رەڤاندی کەتە بەر هێرشێن شەنگەسوارێن مللان، عەدولێ دناڤا گەرماتیا ئاگرێ شەڕدا داخاز ژ دەروێشێ عەبدی کر کو کونێ خوە ل جهەکی بچەقینن دەست د گەردەنا ئێکدو وەرینن ژیانا هەڤژینیێ دناڤ تۆزامرنێ دا پێک بینن. لێ دەروێشێ عەبدی بەرسڤا عەدولێ دا وژێرە گوت” ئەز سوند خۆم ب ئەشقا تەیا پیرۆز هەیا ئەز ل مەیدانا شەڕ سەرنەکەڤم دوژمنێن خوە نە شکێنم ئەز ئەڤینێ نەکەم، ژبەرکو ئەڤینا لژێر شهینا هەسپێن نەیاران وتەقێنا چەکێ دوژمنان چ نرخ و بهایێ خوە نینە. لێ پشتی دەروێشێ عەبدی ل قادا شەڕ سەرکەتی، سۆزا خوە بجهـ ئینا کۆنێ خوە ل بنیا چیایێ قەرەچداخێ ڤەدا، عەدول لسەر تەختێ ئازادیێ ل بەر دنگ وئاوازێن تەیر وتەوالان ل ناڤا سرۆشت وخوەزایێ کوردستانێ دا کرە بۆک و ژ خوەرا ئینا، لەوما ئیرۆ ئەشق وئەڤینا وانا بوویە دەنگ وئاوازێن ستران وهەلبەست و داستانێن کوردی، بوویە ژێدەرێ دیرۆکا ئاشق و ئەڤینداران، گەنج وسنێلەیێن مە لبەر تێهنا ئەڤینا وان گۆڤەند ئازادیێ دشارینن و سرۆدێن سەرکەتنێ دبسترینن.
وەک تێ زانین چینا سنێلان ستوون وهێمایێ جڤاکێ یە، دەنگ و رەنگێ راستی و ئازادیێیە دناڤا تەڤ شۆرەش و سەرهلدانێن گەلان دا، هەرگەنج و سنێلەنە دبنە هیڤی و ئومێدا مللەتان، هەر سنێلەنە دبنە خەتیرێن گەش ل پێشیا کاروانێ خەبات و تێکوشینا نەتەوەیی، ژبەرکو سنێلە مینا کەڤۆکێن ئاشتیێ دبێ سوج و تاوانن، ئەو دکارن رێک و شوپێن پاک ل پێشیا خوە ڤەوژێرن، ژیانا خوە ب رەنگێن ئەڤینێ ب خەملینن، ب هەستێن خوەیێن نازک ئەڤینا خاک و نیشتیمان د دل و دەرونێ خوەدا همبێز بکەن، رێکێن عیلم و زانستی بدەنە پێشیا خوە، ب بنە خوەدی باوەرنامێن بلند پێلێن تاریێ ژ وارێ مە ب رەڤینن، خەلاتێ سەرکەتنێ ب دەست خۆڤە بینن. لەوما شیرەتا مە ژبۆ گەنج و سنێلەیێن کوردستانێ ئەوە کو هشیاربن ب چ گۆتار و مەساژێن خاپینۆک و چیرۆک و مەتەلێن ئەفسانەیی نەهێن خاپاندن، بلا هەر ئێک ب بە دیوارەک خۆرستی ل هەمبەر پلانێن دوژمن و داگیرکەران، ب هەست وهشێن زانستی ب ئەقل و مەژیێ سەردەم دەرگەهێن ژیانێ ل پێشیا خوە ڤەکەن، توڤێ ئەڤینەک پاک ل شوڤا ژیانێ ب چینن، سۆز و پەیمانان ل گەل ئێکدو بجهـ بینن، رێز و رۆمەتێ ل هەڤدو بگرن، ئەرکێ خوە یێ نیشتیمانی و نەتەوەیی ل سەر خوە راکەن، دا دارا ژیانا وان بەرهەمێ پێشەرۆژێ پێڤە بهێت، دا نفشێن ل پەی وان دهێن ب بەرهەمێ رەنج و خەباتا وان شاد و بەختەوەر ب بن. دیسان هیڤیا مە ژ گەنج وسنێلەیێن کۆر و کچ ئەوە دەما دلێ وان دکەڤیتە ئێک کو ژیانا هەڤژینیێ دگەل ئێک پێکدئینن،یان پەیوەندیێن ئەشق و ئەڤینێ ل گەل ئێک گرێد دەن، بلا ئەشقا وان مینا کەش وهەوایێ کوردستانێ یێ پاک و پیروزبیت دا پرۆگرامێ ژیانا وان دقوناغێن خوە یێن سروشتی دا دەربازبیت کو دژیانا هەڤژینیێ دا دوو دل و پەشیمان نەبن، خەیانەتێ ل هەڤدو نەکەن، تایبەت کۆرێن سنێلە، ژبەرکو کۆر هەیا رادەکێ دئازادن د هەول و بزاڤێن خوەدا، لێ کچا کورد د ناڤ چارچۆڤێ مالێ دا قەیدو بەندکرینە، رۆمەتا کچێ پڕ گرانە بن پێ نەکەن، حەنەکا ب قەدەرا وان نەکەن، ژبەرکو سنێلە ژ هەردوو رەگەزان دنازک و هەستیارن. پێویستە ب شێوەک زانستی و ب هەستەک مروڤایەتی سەرەدەریێ ل گەل هەڤدو بکەن. مە هیڤیەک خۆرت ب سنێلە و گەنجێن خوە هەیە کو بدەن سەر رێک و شوپا ئاشق و ئەڤیندارێن کلاسیک مینا مەم و زینان، تاجدین وستیان، خەج و سیامەندا، دەروێشێ عەبدی وعەدولێ و…هتد کو ناما خوە ب ئەمانەت بگەهینن، دیرۆکا گەلێ کورد ب تیپێن زێری ب نەخشینن. هەر وسان هیڤیامە ئەوە کو سنێلێن مە گرێدایی هن رێنما و پرەنسیپێن کولتۆری خوەزایی بن کو گوهداریا ستران و موسیکا رەسەنا کوردی بکەن، ل مەدیا کوردی بنێرن، ب زمانێ کوردی بخوینن، بنڤێسن، خوە ل سەر سیستەم و بنەمایێن زانستی و ئەکادیمی پەروەردەکەن، پێگیریێ ب یاسا و زاگونێن ناڤخویی بکەن، رێز و رۆمەتێ ژ دایک و باب و کەس و کاران بگرن، دۆر بن ژ کار و رەفتارێن خەتەرناک مینا کێشانا مادێ بێ هۆش، درەوێ، بێ بەختیێ، بێ باوەریێ، بێ رەوشتیێ، دزیێ و…هتد، ژبەرکو چینا سنێلان هیڤیا پێشەرۆژا گەلێ مەیە، ئەم ل بەندا بەرهەمێ رەنج و خەباتا وانین.
abalay@hotmail.de

Leave A Reply