بایكوتا ماموستایان ل سلیمانیێ كی زه‌ره‌ر مه‌ند دبیت؟

0

کوردپورتال: سەفین زێباری :

ل سالا 1945، ده‌مێ جه‌نگێ دوویێ یێ جیهانی به‌ر ب روژێن داویێ ڤه‌ دچوو، ویلایه‌تێن ئێكگرتی یێن ئه‌مه‌ریكا، ب چه‌كێ ئه‌تومی هێرشی یابانێ كرن، باژێرێ “هیروشیما” كره‌ ئارمانج، ب جوره‌كێ هێرش هاته‌ ئه‌نجام دان كو بتنێ چه‌ند كه‌سه‌ك د باژێری دا مانه‌ ساخ، یێن دیتر هه‌می كه‌فتنه‌ به‌ر وێ هێرشێ و گیانێ خوه‌ ژده‌ست دان، بریندار بوون، هه‌ر پشتی وێ هێرشی ب چه‌ند روژێن كێم، ئێكه‌م لڤینا ژیانێ د وی باژێری ده‌، ڤه‌بونا ده‌رگه‌هێ خاندنگه‌هێ بوو، وه‌ك د وێنه‌یه‌كێ وی سه‌رده‌می دا دیار دبیت بتنێ چه‌ند قوتابیك دگه‌ل ماموستایه‌كێ دناڤ دیمه‌نێن بترس یێن پاشمایكێن جه‌نگی و بومبا ئه‌تومی، خواندنا خو برێڤه‌ دبه‌ن، هه‌ر ئه‌و بو ده‌رگه‌هه‌ك هه‌تا نها یابان ببیته‌ ئێك ژ پێشكه‌فتی ترین وه‌لات د هه‌مو جیهانێ ده‌. خویایه‌ هه‌ر وه‌لاته‌ك ب خواندن و ژانرێن خاندنێ پێش كه‌فتیه‌، وه‌لاتێن زلهێزێن جیهانێ، یێن دكه‌رتێن پیشه‌سازی و هه‌می بوارێن دیتر یێن ژیانێ د پێشكه‌فتی، ئه‌گه‌رێ ئێكانه‌ ویێ سه‌ره‌كی كه‌رتێ خاندنێ بویه‌، دحكومه‌تا هه‌ر وه‌لاته‌كێ ده‌ وه‌زاره‌تا په‌روه‌رده‌ و فێركرنێ د پلا یه‌كه‌مین دا دهێت و مافێ سه‌ره‌كی یێ هه‌می وه‌لاتیه‌كێ لسه‌ر حكومه‌تێ ل هه‌می جیهانێ ده‌، دابین كرنا خاندن و په‌روه‌ردێ بوو تاكێن وه‌لاتێ خوه‌. پشتی هاتنا چه‌كدارێن داعش و هێرشێن وان یێن درندانه‌ و هوڤانه‌ بو سه‌ر خه‌لكێ كوردستانێ و كوشتن وبرین وتالان كرنا جھ و ده‌ڤه‌رێن كوردا، چه‌ند كاودانه‌كن چوجار لبیرناچن، باندورا خوه‌ لسه‌ر هه‌می بوارێن ژیانێ ئابوری و روشه‌نبیری و جڤاكی كریه‌، هه‌ر ل ده‌مێ هاتنا رێكخراوا تیرورستیا داعش بو ناڤ خاكا كوردستانێ، كریزا دارایی دگه‌ل هات، ئه‌ڤه‌ ژی بو ئه‌گه‌رێ پاش كه‌فتنا هه‌می پروژه‌ و موچه‌یێن فه‌رمانبه‌ر و تاكێ كوردستانێ، كه‌رتێ په‌روه‌ردێ ژی كو ئێكه‌ ژ كه‌رتێن هه‌ری مه‌زاختن دناڤ حكومه‌تێ ده‌، زه‌ره‌مه‌نده‌كا سه‌ره‌كی یا ڤێ كریزێ بویه‌، نه‌دانا موچه‌یێن ماموستایان و كێمیا قوتابخانه‌ و په‌رتوكان ئاریشه‌یێن سه‌ره‌كی یێن كه‌رتێ خاندنێ نه‌ ل كوردستانێ، لێ دگه‌ل ڤان هه‌می ئاریشه‌یان پروسێس نا راوه‌ستیت و نابیت ب راوه‌ستیت، ژبه‌ر كو خاندن هه‌رمی گاڤ وه‌كی هه‌وا و خوارنێ یه‌ و مروڤی، دبه‌ بێ خارن لاشه‌یێ مروڤی لاواز ببه‌،لێ بێ خاندن و په‌روه‌رده‌ مێشكێ مروڤان لاواز دبه‌، كومه‌لگه‌ھ لاواز دبه‌، ئه‌ڤه‌ ژی دبیته‌ باندوره‌ك مه‌زن لسه‌ر پاشكه‌فتنا كومه‌لگه‌هێ كوردی، باندورا وێ بو چه‌ندین سالان دێ ره‌نگڤه‌دانا خوه‌ هه‌بیت ل سه‌ر ژیانا هه‌ر تاكه‌كێ كورد دناڤ كومه‌لگه‌هێ ده‌، له‌وره‌ ئه‌گه‌ر ئه‌م ل بارودوخێ خوه‌ و یێ هند وه‌لاتێن دن بنێرین جیاوازیه‌ك مه‌زن خویا دبیت، ئه‌وژی لسه‌ر هه‌بونا كومه‌له‌ك كریزان لێ خواندن ل وان وه‌لاتان نه‌هاتیه‌ ڤه‌قه‌تاندن، نمونه‌یا هه‌ری به‌رچاڤ یابان و ئه‌لمانیا ل جه‌نگێ دوویێ یێ جیهانی ده‌، لسه‌ر ده‌مێ نهۆ، دڤان دوو سالێن بور ده‌ كاره‌ساتا كو بسه‌رێ كوبانێ هاتی هه‌ر ژلایێ تیرورستێن داعش، بتنێ چه‌ند روژه‌كان پشتی ئازاد بونا كوبانێ،ئێدی خاندنێ سه‌ر ژنوی ده‌ست پێكر و ماموستا و قوتابی پێكڤه‌ و د قوتابخانه‌یێن هه‌رفت ده‌ پروسه‌ به‌ردوام كرن، ل سلێمانیێ و پشتی بورینا نێزیكی دوو مه‌هان بسه‌ر ده‌مێ ده‌ست پێكرنا ده‌واما فه‌رمی ل قوتابخانه‌یان، هه‌یا نها ماموستایێن وان ده‌ڤه‌ران ده‌رگه‌هێن قوتابخانێ لسه‌ر كورێن پیشمه‌رگه‌ و خه‌باتگێران نه‌ڤه‌كرینه‌، بڤی ئاوایی زه‌ره‌مه‌ندێ ئێكانه‌ بتنێ قوتابیه‌، ژبه‌ر كو موچه‌یێ ماموستای هه‌ر دهێت ئه‌گه‌ر ب رێژه‌ كێم ژی بیت، لێ هه‌ر روژه‌كا ژ خواندنا قوتابی دچیت بو ناڤه‌گه‌ریێت، ئه‌وێ كو زه‌ره‌ر مه‌ند دبیت بتنێ قوتابیه‌، بتایبه‌ت كورێن پێشمه‌رگه‌ و هه‌ژاران ژبه‌ر كو بو چینا ئه‌رستوكراتان قوتابخانه‌یێن تایبه‌ت هه‌نه‌ و زارویێن وان ژ خواندنێ بێ به‌هر نابن، له‌ورا پێتڤیه‌ لسه‌ر هه‌مو ماموستایێن كوردستانێ و بتایبه‌ت سلێمانی و ده‌ردورێن وان یێن كو هه‌یا نهو ده‌ست ب پروسێسا خاندنێ نه‌كری، ده‌ست دناڤ ده‌ست پروسێ به‌رده‌وام بكه‌ن نه‌هێلێن زارویێن پێشمه‌رگه‌ و هه‌ژاران بێ خاندن بمینن، ژبه‌ر كو هه‌ر كریزه‌ك یان ئاریشه‌یه‌ك هه‌بیت دێ یا كاتی بیت، لێ ئاریشه‌یا خاندنێ و پاش كه‌فتنێ ده‌مه‌ك درێژ بو دڤێت و زوی ب زوی ناهێته‌ چاره‌كرن، به‌رمایكێن وێ هه‌تا هه‌یامه‌ك درێژ دمینن.

Leave A Reply