ئشق و ئازادی

0

کوردپورتال: ئەحمەد بالایی :

په‌یڤا ئشق پڕ واته‌ و رامانانێن خوە هه‌نه‌، ژبه‌رکو ئشق نه‌ تنێ دلداریا کچ وکۆرایه‌، نە شه‌وتاندنا جه‌رگ و دلایه‌، نه‌ژی دیتنا چاڤ و رەنگ و دەنگایه‌، بەلکو ئشق ژبۆنا هه‌ر جۆرێ دلۆڤانی، حه‌زژێکرنێ، خۆشتڤیێ و هەست نازکیێ و… ) یە، کو باندۆرا خوە ل سەر هه‌ست و سۆزێن مرۆڤی بکه‌ت، و ژدانا مرۆڤی ب ئازرینیت، دل و دەرۆنێ مرۆڤی بشکۆرینیت، رۆندکان ژچاڤان ب بارینیت و… ) وەک تێزانین چه‌ندین جۆر، ره‌نگ و شێوازێن ئشق و ئه‌ڤینێ لبا مرۆڤی هه‌نه‌. مرۆڤ دکارە به‌شه‌کێ ژ وێ ئشقێ ب چاڤ ب بینیت و گۆهلێ بگریت رەنگێن جوان و به‌دەو و دلڤه‌که‌ر بۆ خوە هه‌لبژێریت، دەنگ و ئاوازێن نه‌رم و نازک دناڤ په‌ردێن گۆهێن خۆدا تۆماربکه‌ت خۆشی و له‌زەتێ لێ وەربگریت، ئاگرێ جه‌رگ و دلان پێ ڤه‌مرینیت، رەنگێن ژیانێ پێ ب خه‌ملینیت. مینا ئشق و ئه‌ڤینا دایک و بابان، خۆشک و بران، دوست و یاران، کچ و کۆران، خاک و نییشتیمان، سرۆشت و خوەزایی و… هتد لێ هن جۆرێن ئشقێ هه‌نه‌ مرۆڤ نه‌ رەنگێ وێ ب چاڤ دینیت، نه‌ دەنگێ وێ دبهیزیت، نه‌ ئه‌و مرۆڤی ناس دکه‌ن، لێ ئه‌و جۆرێ ئشقێ هه‌رتم ژ مرۆڤان را بووینه‌ رۆگه‌هێن پیرۆز به‌ژنا خوە لبه‌ر د ته‌وینن، خوینا جانێ خوە ژ بۆ درژینن بێ کو مفایه‌کی لێ وه‌ربگرن، یان د فه‌لسه‌فه‌ و رامانا وان بگه‌هن و سەدەما هەبووان وان بزانن. مینا ئشقا خۆداوه‌ندان،به‌هه‌شت و په‌ریان خه‌ون و خه‌یالان و…هتد. له‌وما ئشق په‌یڤه‌که‌ لگه‌ل تاڤ و ئه‌لندا ل دەرازینکێن ئه‌ڤینداران سلاڤ دکه‌تن، بۆکه‌ک جوان و خه‌ملاندیه‌ نیڤا شه‌ڤان مرۆڤی شێت و شه‌یدادکه‌ن ژ خه‌واخۆش و شرین هشیاردکه‌تن، خۆناڤ و خویسارەکه‌ به‌لگێن گۆلان همبێز دکه‌ن، تاڤی بارانه‌که‌ وەرزێن هیڤیان گه‌ش دکه‌ن و باخچێن ئه‌ڤینێ ژ رنگێن ژیانێ خیڤ دکه‌ن. بێگۆمان هن جاران ئشق و ئه‌ڤین به‌رێ مرۆڤان د دەته‌ رێکێن سه‌خت و دژوار و دنیڤا رێدا وندا دبیت بێی کو ئه‌نجامه‌کی ب ده‌ست خۆڤه‌ بینیت. هن جاران ژی دبیته‌ سوارێ مه‌یدانێ خه‌لاتێ سه‌رکه‌فتنێ ب دەست خۆڤه‌ دئینت و لبه‌ر کێله‌کا خوه‌ درازینیت. جاران ژی مرۆڤ دبه‌ قوربانیێ په‌یڤا ئشقێ خوینا جانێ خوه‌ ژبۆ درژینیت. هه‌لبه‌ت مرۆڤ نکارە هه‌فسارێ ئشقێ تنێ ب ئاله‌کی ڤه‌ گرێبدەت، یان سنۆرەکی ژبۆ په‌یڤا ئشقێ دانیت، ژبه‌رکو ئشق خه‌لاته‌ک خۆدای یه‌ ژبۆ چ قه‌رال و سۆلتانان خوە نا ته‌وینیت، په‌یڤه‌ک ئاگریه‌ پڕجاران خۆدانێ خوە دسۆژیتن، هه‌سپه‌ک شه‌مبۆز و بێ هه‌فسار خوە ل چ کیشوەران نا گریتن، رۆبارەک خۆرت و سه‌رئه‌ڤرازە به‌رب کنارێن بێ ناڤ و نیشان دهه‌رکیتن، سۆز و په‌یمانه‌که ئەزەلیە بخوینا جه‌رگ و دلان ئیمزادبیت. له‌ما ئه‌ز دبێژم: تۆڤێ ئشق و ئه‌ڤینێ ل شۆڤا ئۆمێدان تێ چاندن، به‌رهه‌مێ وێ بدارا ئازادیێ ڤه‌ دهێتن و لبێده‌را خۆزیان به‌ربا دکه‌ن. ئشق هیڤیه‌ک وندایه‌ لگه‌ل تیژکێن رۆژێ دهه‌لێتن و دناڤ شه‌پۆلێن تاریێدا ئاڤا دبن. لێ ئشقا بێ ئازادی مینا که‌له‌خه‌ک بێ رحو جانه‌ ل به‌رچاڤێن مرۆڤی دمریتن، مومه‌ک کز و ڤه‌مریایه‌ ل کۆژیێن تاری دسۆژیتن، مه‌له‌ڤانه‌ک بێ به‌ڤل و بزاڤه‌ دناڤ پێلێن دەرییا ئاشۆپ و خه‌یالاندا دخه‌ندقیتن، ژبه‌رکو ئه‌گه‌ر مرۆڤ یێ ئازاد نه‌بیت تام و بێهنا ژیانێ ژ چ جۆرێن ئشق و ئه‌ڤینێ ناهێتن، رۆناهی ژ بیناهیا چاڤان سل دبیتن، شێر ژ سیبه‌را خوه‌ ترسیتن، ئه‌ڤین هه‌رتم د دلێ مرۆڤی دا دێ قه‌ید و به‌ندکری بیت نکارە ب رۆلێ خوە رابیت و ئه‌رکێ خوە ئه‌دا بکه‌ت. ئه‌گه‌ر مرۆڤ د ژیانێدا یێ سه‌ربه‌ست و ئازاد نه‌ بیت، مرۆڤ یێ بێ ئشق و ئه‌ڤینه‌، بێ دین و دەوله‌ته‌، بێ مال و سامانه‌، بێ خاک و نیشتیمانه‌ و…) ژبه‌رکو مرۆڤێن بن دەست و چه‌وساندی هه‌رتم بێ به‌هرن ژ هه‌موو مافێن ژیانێ، دابرینه‌ ژ بریار و کریارێن چارە نڤێس، نه‌ ئشق و ئه‌ڤینا وان بێ خۆیکا سولتانی ل تاخیبێن پێوانکری دەرباز دبیتن، نه‌ مال و سامانێ وان ل ئۆمبار و خزینان مشت و مسۆگه‌ر دبیتن، نه‌ژی خاک و نێشتیمانێ وان ل سه‌ر ناڤێن وان تاپۆ و مشکانه‌ دبیت، هه‌رتم وەلاتێ وان دێ بیته‌ جهێ پێکۆل و گه‌ڤزکا هه‌سپێن داگیرکه‌ران، دێ بیته‌ بازگه‌ها ره‌فێن بکوژ و ئه‌هریمه‌نان، کو دەمارێن جڤاکێ ب مێژن تۆڤێ مرنێ ل شۆڤا ژیانێ بچینن، سه‌رێن ئه‌ڤینداران بخه‌نجه‌رێن ژەهرکری ب فرینن. له‌وما ئازادی سه‌رپشکا رەنگێن ژیانێ یه‌، هێڤێن و هێمایێ به‌رخۆدان و سه‌رخوەبوونا گه‌ل و ملله‌تایه‌، رەنگێ سۆرێ خوینا ئه‌ڤیندار و جانگۆریانه‌، له‌وما شه‌هید مه‌زلۆم دۆگان لبه‌ر حنگا مرنێ لناڤ پێلێن گۆڕیا ئاگرێ نه‌ورۆزێ دا ل زیندانا ئامه‌دێ ژ گه‌لێ کورد را دبێژە: (به‌رخۆدان ژیانه‌)، ئازادی ئشق و ڤیانه‌، سه‌رخوه‌بوون ئارمانجا مه‌ کوردانه‌، ژبه‌رکو به‌رهه‌مێ شه‌ڕ و به‌رخۆدانان لدژی هێزێن سه‌ردەست خه‌لاتێ ئازادیێ ب دەست خۆڤه‌ دئینن گه‌ل و ملله‌تان ژ قه‌ید و به‌ندێن کوله‌تیێ قورتال دکه‌ن، دیوارێن دین و دەوله‌تان ل سەر بنگه‌هێ ئازادیێ ئاڤادکه‌ن. ئاشق و ئه‌ڤیندران ب پێکا ئازادیێ مه‌ست و سه‌رخۆش دکه‌ن. له‌وما ژیان بێ ئازادی نامه‌شه‌، ئازادی ژی بێ ئشق وڤیان نابه.
زانایێ ئه‌لمانی شیلله‌ر دبێژە:( ئازادی ل سه‌رێ چیانه‌) هه‌ر که‌سێ بخازە دژانێدا یێ ئازاد به‌ و هێلێنێن ئه‌ڤینێ ئاڤا بکه‌ن، خوە ژ دەست چینا فه‌ودال و رژێمێن دکتاتۆر و مێتنگه‌هێن سه‌ردەست قورتال به‌که‌ن بلا قه‌ستا سه‌رێ چیا بکه‌ن، ژبه‌رکو تنێ ل سه‌رێ چیان مرۆڤ دکارە بایێ ئازادیێ هه‌لکێشیت تام و له‌زەتا ژیانێ بزانیت، ناسناما خوە ب پارێزیت و به‌رگریێ ل هه‌بوونا خوە بکه‌ن. له‌وما سه‌رێ چیان دبنه‌ سه‌نگه‌رێن شه‌رڤانێن ئازادیێ، لات و زنار دبنه‌ هێلینا کەلێن کویڤی رەنگێن ژیانێ دئافرینن. دیرۆکا چاندا مه‌ مه‌ژی پڕە ژسه‌رهاتی و سه‌ربۆرێن بڤی رەنگی، کا چاوان چیایێن مه‌ دبنه‌ رۆگه‌ها ئاشق و ئه‌ڤینداران نیشانا بۆکانیێ لبه‌ر چرایێ ئازادیێ ل هه‌ڤدۆ پیرۆز دکه‌ن، رێڤنگێن رێیا ئازادیێ بهه‌ست و سۆزێن ئه‌ڤینداران خه‌لات دکه‌ن و به‌رب زۆزانێن ژۆری وەغه‌ر دکه‌ن. کا چاوان ل چیایێن کوردستانێ ژی کانیێن ئه‌ڤینێ دزێن، ئه‌لندا ئازادیێ ل سه‌رێ کۆمت و چیا دهه‌لێتن، دەنگێ سرۆدا شۆرەشێ ژ گه‌لی و نوهالان دهێتن، ئاشق و ئه‌ڤیندار ژی خوە د به‌ختێ چیان وەردکه‌ن گۆڤه‌ندا ئازادیێ ل به‌ر دەنگ و ئاوازێن شالۆل و بلبلان د شارینن. هەلبەستڤانێ ناڤدارێ کورد ئەحمەدێ خانی ل سەر ئازادیێ دبێژیت: ( ئەگەر مرۆڤ خوەدی ئیرادەک ئازاد نەبیت جڤاکا ئازاد ژی چێنابیت). لەوما کەسێن ئازاد دیوارێن جڤاکەک ئازاد دئاڤادکەن. ناڤدار و زانایێ کورد سەعید نورسی دەربارەیی ئازادیێ دبێژە: ( ئەز دکارم بێ نان بژیم لێ نکارم بێ ئازادی بژیم).

Leave A Reply