رۆلێت ل دھۆکێ دھێتەکرن

0

کوردپورتال :

سەرۆکێ لیژنا ھێزێن ئێمناھیا ناڤخۆیی ل ئەنجومەنێ پارێزگەھا دھۆکێ ئاشکرا کر کو یاریا کینویێ ل ژێر ناڤێ دومبەلێ دھێتەکرن و ئەو ب خوە نە دۆمبەلەیە و گۆت “ل ژێر ناڤێ چەند یاریان رۆلێت ژی بێی مۆلەت ل دھۆکێ دھێتەکرن”.
ئەحمەد محەمەد ئەمین سەرۆکێ لیژنا ھێزێن ئێمناھیا ناڤخۆیی ل ئەنجومەنێ پارێزگەھا دھۆکێ بۆ رۆژناما ئەڤرۆ خویا کر پشتی گەلەک گازندە ل سەر یاریا (کینویێ) گەھشتینە وان و پشتی دووڤچوون ژ ئالیێ وان ڤە ھاتیە کرن دیار بوو کو یاریا کینویێ سیستەمەکێ ئەلکترۆنی یە و گرێدایی قبرس و ئەلمانیا و ئیتالیایە و دەستووریا ڤەکرنا ھۆلێن ڤێ یاریێ ژ ئالیێ حوکمەتێ ڤە دھێتە دان و گۆت “ل دھۆکێ 15% پارێ ڤێ یاریێ بۆ وان کۆمپانیێن بیانی دچیت”.
سەرۆکێ لیژنا ھێزێن ئێمناھیا ناڤخۆیی ئاشکرا ژی کر کو ئەڤ سیستەمە وەسا ھاتیە بەرمەجەکرن کو کۆمپانی و خودانێن ھۆلان خوسارەت نەبن، بۆ نموونە ھەتا خودانێ ھۆلێ 200 ھزاران وەرنەگریت 100 ھزاران نادەت و گۆت “ھەکە بزانن ئێک دێ فایدە بیت، شارەزایێن ڤی سیستەمی دشێن دەستکاریێ د ژماران دا بکەن، داکو ئەو کەس فایدە نەبیت و ئەڤ دەستکاریە ل دھۆکێ ھاتیە کرن”.
ئەحمەد محەمەد ئەمین دیار کر کو ل ژێر ناڤێن یاریێن (دۆمبەلە، پلەی ستێشن، ئوکەی، تاژی، ھەسپ) یاریا رۆلێتێ ل دھۆکێ دھێتەکرن و گۆت “یاریا رۆلێتێ مۆلەت نینە و پێدڤیە ب ھەر حالێ ھەبیت بھێتە گرتن، چونکی ئەڤا نھا دھێتە کرن نەدۆمبەلەیە، بەلکو ھەمی سنوور بەزاندینە”.
ل دووماھیێ سەرۆکێ لیژنا ھێزێن ئێمناھیا ناڤخۆیی ل ئەنجومەنێ پارێزگەھا دھۆکێ خویا کر کو ژ بلی ئاریشێن جڤاکی و یێن ئەمنی، یاریا کینویێ کارتێکرنا ئابووری ژی ھەیە، چونکی پارێ کوردستانێ دچیتە ژدەرڤە و گۆت “مۆلەتێن وان ب سەرڤە چووینە و ئاریشا مە ئەوە کو مۆلەتێن ڤێ یاریێ ل ھەولێرێ و سلێمانیێ ھاتینە نووکرن، لەورا گڤاشتن ل سەر مە ژی دھێتەکرن کو یێن دھۆکێ ژی بھێنە نووکرن”.

Leave A Reply