یان مورسی یان نەمان !

0
یان مورسی یان نەمان !
یان مورسی یان نەمان !
کوردپورتال/ئیسماعیل عەلی دۆسکی
ئەگەر لبەرپەرێن دیروکێ یێن کەڤن بزڤرین، دێ زانین کا بۆچی دگوتە مسرێ ‘دایکا دونیایێ’ لێ ئەڤرو ژبەر بارودوخێن سیاسی گەلەک ژمللەتێ مسری یێل عەنبارێن گلێشێ خەلکی دگەریێن دا ئاشکێ خو تێر بکەن. من جارەکێ بسەرنجی بەرێخودا مانشێتەکا سەرەکی لسەر بەرپەرێ ئێکێ یا روژنامەیەکا مسری بڤی رەنگی “ماما قطر تتبرَع للشَعب المصريَ بمبلغ …. دولار ” ئانکو ئەڤرو وەلاتێ فەراونە ئەڤێن زەمانەکی دایکا دونیایێ وەلێ بهێن وەلاتەکێ ژ باژێرەکێ مسری بچیکتر و تازە بەری دەهان سالەکا شیرێ ئازادیێ خواری رابیت هاریکاریا بو گەلێ مسرێ بهنێریت و دا مسری دەستا سەرئەڤراز بکەن حەتا قەتەر نانی بدەتێ.
مە دیت کا چاوا بدەهان سالا پشتی کوشتنا ساداتی ببەهانەیا خیانەتا نەتەوەیی موبارەکی دەست ژ کورسیێ بەرنەدا حەتا روژ بو روژێ مللەت برسی کری دا لدیڤرا خەونا مەزنا ئیخوان موسلمینا برێکا سەروکێ وان یێ هلبژارتی محەمەد مورسی ببیتە راستی و دەلیڤەیەکا دیروکی بووان بو دەسهەلاتێ بدەستکەڤیت و ئایدیولۆژیا خۆیا کەڤنا بەری نزیکی سەد سالا ددامەزراندنا پارتا خودا و ئەو سیاسەتا تێکهەل بئولێ ئیسلامێ دارێشتە ناف وەلاتەکێ مەزنێ وەکو مسرێ کو مللەتێ وێ بچەندین پێکهاتە و ئول و هزرێن ژێکجودا پێکدهێت بێی هزرکرن کو سیاسەتا وان دگەل سروشتێ ڤی وەلاتی ناگونجیت نەژلایێ سوسیولۆژی، نە بەرەیی و نەژی فرەئولی، دیسا میسر ژکەڤندا و تا نوکە لاندکا هەمی رەنگێن هونەری و ئەدەبی و رەوشنبیریێە و نکارن بپلەکێ بچنە سەرێ ملەکێ و هەمی درویشمێن سەردەمیێن مە گوتین بگوهورن بهندەک درویشمێن بەری سەدان سالا و وەلاتی ژهەمی هزر و شارەڤانیێ بێ بەهر بکەن.
یا مەڤیای پتر دڤی بابەتیدا هایڵاییت بکەین و رێسکا لبن پەیڤا بکێشین ئەوە موخابن هندەک ژ وەلاتیێن مەیێن کورد دبوچونێن خودا بوینە دو پشکێن ژێکجودا وەکو کێرک و پەنیری پشکەک بوینە مریدێت مورسی و ئیخوانا هەرچەندە ئەو بخو نەچ ژ ئیخوانا دزانن و نەژی سیاسەتا دکتور مورسی. ژلایەکێ دیژی پشتەڤانێن کۆدەتایا دژی مورسی نە، بێی هزربکەن هەر چاوا بیت ئەو کۆدەتا کارەک نە شەرعی بو دلادانا کەسەکی ژلایێ مللەتێ وان هاتیە هلبژارتن و هەر چاوا بیت ئەڤە چارەنڤیسێ وانە و پێتڤیە ئەو بخو چارە بکەن.
لێ گەلێ مە لسەر ئاخا خۆیا کوردستانێ هێشتا بئازادیا خو شاد نەبویە نە گەلەک دویرە روژەکێ بخوپیشاندانا راببن و وێنەیێن مورسی راکەن و بێژن: یان مە مورسی یان مرن. ئەرێ کەسەکێ وەکو مورسی بمینیت یان نەمینیت دێ چ خزمەت ل گەلێ کوردستانێ هێتەکرن؟! ئەرێ ئەو کەسێ نەشیای کێشەیێن وەلاتێ خو چارەسەر بکەت و لجهێ حوکمرانیەکا مەدەنی، دڤی چاخیدا زەبروزەنگیا ئیسلاما سیاسی لسەر گەلێ خو بسەپینیت و دوژمنکاریا هەمی هونەرمەند و هزرڤان و وەرزشڤانا بکەت و لجهێ وەلاتەکێ گەشتگوزاری وەلێ بکەت خەلک بوخو ژێ برەڤن و ئەو شارستانیەتا مسرێ بەرەف ئەفگانستانەکا دی ببەت دێ هزر و سیاسەتا وی چ مفای گەهینتە مە؟! ئەرێ چ وەلاتەکێ ئەرەبی و کێش سەرکردەیێ ئەرەب د ساڵێن درێژێن بوینە دوزەخ بو گەلێ کوردستانێ ژ ئەنفالێن رەش و کیمیابارانا حەلەپچە لدیف قێژینا زاروکێن بوینە قوربانی یان نالینا دایکێن شەهیدێن کوردستانێ هاتینە یان ئەڤە دانپێدان کرینە و گوتینە کوردستان مللەتەکە و بزۆری هاتیە دابەشکرنێ و پشتەڤانیا مافێن وان دکەین بو ئازادیێ؟! ژبلی هندەک هەلویستێن سەرکردەیەکێ وەکو قەززافی، بەروڤاژی دسەر هەمی زۆرداریێن بسەر گەلێ کورد هاتین، جهێ داخێیە ئەوان وەکو بینەرێن فلمەکێ سینەمایی بەرێخو ددا گەلێ مە ، دوەختەکیدا بیانیا، نە ژ دین و نەژ رەنگ و نەژ رەوشت، هاریکاریا مە دکرن.
موخابن بەشەک ژ جحێلێن مەیێن کورد لڤی سەردەمێ پێشکەفتیێ تەکنولۆژیایێ و وان خوشی و نازداریێن ئەو تێدا بسەرپەرشتیا دەسهەڵاتا کوردستانێ دژین، لجهێ ئەو ببنە داهێنەر و بەهرەمەند و هزرڤان و رەوشنبیر و تەکنیککار و کارێن دی، کو خوژی ئاڤا کەن و گەلێ خوژی بهزر و شیانێن خو ئاڤا بکەن و پێشبێخن و بخامەیێ خو تولێ لدوژمنا ڤەکەن، دێ چن بنە خزمەتکار و پشتەڤان بو هندەک بیانیا وەکو لڤان روژا و پشتی رویدانێن وەلاتێ مسرێ مە گەلەک هەلویستێن سەیر و سەمەر لسەر فەیس بوکێ و تورەیێن دیێن ئنترنێتێ دیتن وەکو هندەکا بەرێز موورسی کریە قەهرەمان و هندەکێن دی وێنەیێن جوامێری ئێخستینە د پروفایلێن خودا و هوسا و ژبلی دوعایێن وان : یا رەببی تو ئیخوانا و سەروکێ وان بسەربێخی و تو دوژمنا بشکێنی. لەوا ئەڤرو لبەرمەژی هندا بویە کانێ ئەم کورد کینە؟ و کینە دوژمنێن مە ؟ و هەروەکو مە چ جار چ کێشە و زۆرداری نەدیتینە ڤێجا داخازێ ژ خودێ مەزن ژی بکەین پارتەکێ یان حوکمەتەکێ سەربێخیت کو چ جار بشاشی ژی پەیڤا کوردستانێ لسەر ئەزمانێ وان نەهاتیە گوتن.

Leave A Reply