فلمە فێستیڤاڵا ناشڤیل ب مەحفیرێ سوور پێشوازیێ ل شاندێ کوردستانێ و ئەکادیمیا ئۆسکارسێ کر (وێنە)

0
فلمە فێستیڤاڵا ناشڤیل ب مەحفیرێ سوور پێشوازیێ ل شاندێ کوردستانێ و ئەکادیمیا ئۆسکارسێ کر (وێنە)
فلمە فێستیڤاڵا ناشڤیل ب مەحفیرێ سوور پێشوازیێ ل شاندێ کوردستانێ و ئەکادیمیا ئۆسکارسێ کر (وێنە)
کوردپورتال / شەھیان تەحسین- ناشڤیل، ئەمریکا
پشتی وان ئامادەکاریێن ھاتینە کرن ژلایێ فلمە فێستیڤالا دھوک یا نێڤ دەولەتیڤە بو بەشداری کرنا فلمێن کوردی ل فێستیڤالا ناشڤیل، ل ڕوژا ١٩ ڤێ مەھێ پێشوازی ل شاندێ فێستیڤاڵا دھوکێ و ئەکادیمیا ئۆسکارسێ ھاتە کرن ل سەر مەحفیرێ سوور و د ڕێ و ڕەسمەکێ ژ ھەژی دا دەست ب ڕوژا ئێکێ یا تەرخان کری بو فلمێن کوردی ھاتە کرن و ب ئامادەبوونا میدیا کوردی و ئەمریکی (تێد کرۆکێت) ڕێڤەبەرێ فلمە فێستیڤاڵا ناشڤیڵ دل تەنگییا خوە دیارکر بەرامبەر گیروکرنا ڤیزێن شاندێ کوردستانێ وگوت جھێ دل گرانیێ یە کو شاندەک پێک ھاتبیت ژ ٢٠ کەسان بتنێ ٥ کەس بگەھنە فێستیڤالێ، ھەروەسا گوت (ئەڤێ ڕەفتارێ کارتێکرنەکا نەرێنی ل سەر فێستیڤاڵا ناشڤیل کر) و پاشان خوەش حالییا خوەژی دەربڕی بئامادەبوونا ھەر ٥ کەسێن شاندێ کوردستانێ یێن کو شییاین بگەھنە ناشڤیل ددەمێ خوەدا.
فلمێ ڤەکرنێ یێ پروگرامێ سینەما کوردی فلمێ دەرھێنەر (ھنێر سەلیم) بوو ب ناڤێ (ئەگەر تو بمری دێ تە کوژم)، کو سەرەرای وان خەلاتێن بدەست خوڤە ئیناین ل فیستیڤالێن جیھانی، ئەڤ فلمە خودان خەلاتێ باشترین فلمێ درێژە ل ئێکەمین فلمە فێستیڤالا دھوک یا نێڤ دەولەتی. ژمارەکا مەزن ژ بینەران د ئامادەبوون د ھوڵا سینەمایێ ڤە، و ژ وان بینەرێن د ھولێڤە ئەندامێن ئەکادیمیێ بوون کو بو جارا ئێکێ یە فلمەکێ کوردی ببینن، و ئەڤ فلمە ببو جھێ دلخوەشیا وان. (سید گەینس)ئەندامێ ئەکادیمیا ئۆسکارسێ پشتی ژ ھوڵا سینەمایێ دەرکەفتی پەسنا فلمێ ناڤھاتی کر و گوت: (من کوردستان و فلمێن کوردی نەدیتینە بەلێ پا ئەڤی فلمێ کومیدی , جڤاکی, ئەڤینی و درامی , سیاسی گەلەک لایەنێن ژیانێ و نەریتێن کوردستانێ نیشا من دان).
د روژا دووێ یا فێستیڤالێ دا ژبلی نیشاندانا فلمێن کوردی , سمینارەک لدور مەترسیێن دروست کرنا فلمان ل روژھەلاتا ناڤین ھاتە برێڤەبرن ژلایێ (ئێلێن ھێرینگتۆن) ئەنداما ئەکادیمیا ئۆسکارسێ، ل دەست پێکا ئاخفتنا خو ھێرینگتونێ گوت ( ئەکادیمیا ئۆسکارس یا شانازە ببەرھەڤبوونا شاندێ کوردستانێ و ئەم ب ھیڤینە د پاشەروژەکا نیزیک پروژێن مەزنتر ئەنجام بدەین) و گوتژی (ئەم ھاتینە ناشڤیل بتنێ داکو فلمێن کوردی ببینین و ژ نێزیک دیدارا دگەل گەنجێن کوردستانێ بکەین). و پاشی چەندین پرسیار ئاراستەی سیمینار بێژا کرن. د بەرسڤا پرسیارەکا خانم ھێرینگتون ێدا (نەجات عبداللە) نوینەرێ حکومەتا ھەرێما کوردستانێ بو کاروبارێن ڕەوشەنبیری و ھونەری ل ئەمریکا پشتەڤانیا حکومەتا ھەرێمێ دیارکر بو کەرتێ سینەمایێ و تەکەز ل سەر رولێ کەرتێ تایبەت کر کو مل ب ملێ کەرتێ میری کاربکەت بو پێشڤە برنا وارێن ڕەوشەنبیری و سینەمایی ل کوردستانێ و دروست کرنا بینەرێ فلمان. ل دویف دا خانم (بینا قەرەداغی) ڕێکخەرا فلمە فێستیڤالا دھوک یا نێڤ دەولەتی بو فلمساز و سینەماکارێن بیانی دا زانین کو کوردستان جھەکێ ئارامە بو دروست کرنا فلمان و سروشت و جوغرافیا کوردستانێ جھێ سەرنج راکێشیا دەرھێنەر و فلمسازایە، و بچەند نموونا ل دور ھاریکاری و دل فرەھییا خەلکێ کوردستانێ بو ستافێن فلما ئاخفت. و ھەروەسا (شەمال سەبری) رێکخەرێ فلمە
فێستیڤالا دھوک یا نێڤ دەولەتی بو ئامادەبوویان دیارکر کو کوردستان یا پڕە ژ چیروک و سەرھاتی و ڕاستییان کو دێ بنە بابەتێن باش بو فلمان و گوت ژی کو گەنجێن کوردستانێ ھەردەم د ئامادەنە کاربکەن بو بەرچاڤ کرنا کەلتور و نەریت و ڕەوشتێن کوردان بو جیھانێ. ژ لایەکێ دیڤە (د. ئدریس عوسمان) ل دور نەخوشی و بن دەستییا گەلێ کورد کر ل کوردستانا سوریێ پەیڤی و داخواز ژ سینەماکاران کر کو بەلگە فلمان ل دور ڤان ڕاستییا سازکەن داکو دەنگێ وان بگەھییننە جیھانێ. ب دیماھیک ھاتنا سمینارێ (توم پولوک) ئەندامێ ئەکادیمیا ئوسکارسێ بەردەوام پرسیار لدور مێژوو و ژیان و کەلتورێ گەلێ کورد دکرن ژبەرکو ئەو فلمێن ھاتینە نیشاندان سەرنجا وی راکێشا بوو و دبەرسڤا پرسیارەکا مەدا کا ئایا فلمەکێ کوردی چەندێ دیرە ژخەلاتێ ئوسکارێ , گوت (کوردان دەرھێنەر و فلمسازێن خودان شیان ھەنە لەوما یا دیر نینە کوردەک ببیتە خودانێ خەلاتێ ئوسکارسێ بەلێ پا لدەمێ پێشکێشکرنا فلمەکی دڤێت بناڤێ وەلاتەکێ سەربەخو ئانکو دەولەتەکێ پێشکێش بکەت و ژبەر بن دەستیا پارچێن دی یێن کوردستانێ , ھەرێما کوردستانێ پتر دەلیڤە یا ھەیی بەشداریێ بکەت بەلێ پا ھەر دڤێت ب رێکا عیراقێ بیت )
پشتی کو ١٥ فلمێن کوردی ھاتینە نیشاندان و بەشداری پێشبرکێ یا فلمە فێستیڤالا ناشڤێل بوین , ل روژا سیێ یا پروگرامێ فلمە فێستیڤالا دھوک یا نێڤ دەولەتی ل ناشڤێل بدیماھیک ھات ب سازکرنا کونسێرتەکا ھونەری بو ھونەرمەند (بەنگین ئامێدی) و گروپێ سەما کوردی , ل دەسپێکا ئاھەنگێ (بینا قەرەداغی) سەرپەرشتا شاندێ فلمە فێستیڤالا دھوک یا نێڤ دەولەتی پەیڤەک پێشکێش کر کو تێدا داخوازا لێبورینێ کر ژ رەڤەندا کوردی ل ناشڤێل ژبەرکو ھەمی شاندێ کوردستانێ نەشیا بگەھیتە ئەمریکا و بخێرھاتنا ئەندامێن ئەکادیمیا ئوسکارس کر و ب ئومێدا کو ل کوردستانێ پروژێن ھەڤپشک ئەنجام بدەن بو خزمەتکرنا سینەما جیھانی . پاشان ئاھەنگێ دەست پێکر ب ستران و دیلانا کوردی.
ژھەژیە بێژین کو فلمە فێستیڤالا ناشڤێل دێ تا کو ٢٥.ی ڤێ مەھێ یا بەردەوام بیت , و فلمە فێستیڤالا دھوک یا نێڤ دەولەتی دڤێ فێستیڤالێ دا بەشداری کر وەک سپونسەرێ زێرین دا کو رەڤەندا کورد بێ بەھر نەبن ژ چالاکی و فلمێن کوردی ھەروەسا دا کو ئەمریکی ئاشنا بن ب سروشت و کەلتور و رەوشنبیریا کوردستانێ.
Ellen Herrington

nejat ebdulla u bina qeredaxi

roja ek

roja ek02

sid ganis

sminar

tom pollok

Leave A Reply